ಜಾಮ್‌ನಗರ,ಸೆಪ್ಟೆಂಬರ್ 04 : ರಿಲಯನ್ಸ್‌ ಇಂಡಸ್ಟ್ರೀಸ್‌ ಆರಂಭಿಸಿರುವ ವನ್ಯಜೀವಿ ರಕ್ಷಣೆ ಮತ್ತು ಪುನರ್ವಸತಿ ಕೇಂದ್ರವಾಗಿರುವ ವಂತಾರಾ ಸಂಸ್ಥೆಯ ನೂತನ ಆಡಳಿತ ಮಂಡಳಿಯನ್ನು ಘೋಷಿಸಲಾಗಿದ್ದು, ಕರ್ನಾಟಕದ ನಿವೃತ್ತ ಐಎಫ್‌ಎಸ್‌ ಅಧಿಕಾರಿ ಸುಭಾಷ್ ಮಲ್ಕೇಡೆ ಸೇರಿದಂತೆ ಐವರು ಸದಸ್ಯರಾಗಿ ನೇಮಕವಾಗಿದ್ದಾರೆ.
ಈ ಐದು ಸದಸ್ಯರ ಮಂಡಳಿಯು, ಒಬ್ಬ ಪದನಿಮಿತ್ತ (Ex officio) ಸದಸ್ಯರೊಂದಿಗೆ ಸೇರಿ ವನ್ಯಜೀವಿ ನೀತಿ, ಅಂತರರಾಷ್ಟ್ರೀಯ ಮತ್ತು ರಾಷ್ಟ್ರೀಯ ಕಾನೂನು, ಸಾಂಸ್ಥಿಕ ಮೇಲ್ವಿಚಾರಣೆ, ವನ್ಯಜೀವಿ ಅಪರಾಧ, ಮಾನವ-ವನ್ಯಜೀವಿ ಸಂಘರ್ಷ, ಮೃಗಾಲಯ ಮತ್ತು ಅಕ್ವೇರಿಯಂ ಮಾನದಂಡಗಳು, ಪಶುವೈದ್ಯಕೀಯ ಆರೈಕೆ ಹಾಗೂ ಸಮುದಾಯ ಆಧಾರಿತ ಸಂರಕ್ಷಣೆಯಲ್ಲಿ ಪರಿಣತಿ ಹೊಂದಿರುವ ಪ್ರಮುಖ ಭಾರತೀಯ ಮತ್ತು ಅಂತರರಾಷ್ಟ್ರೀಯ ತಜ್ಞರನ್ನು ಒಳಗೊಂಡಿದೆ.
ಮಂಡಳಿಯ ಪ್ರಮುಖ ಸದಸ್ಯರು:
ಜಾನ್ ಇ. ಸ್ಕ್ಯಾನ್ಲಾನ್ ಎಒ (John E. Scanlon AO): ಅಳಿವಿನಂಚಿನಲ್ಲಿರುವ ವನ್ಯಜೀವಿ ಮತ್ತು ಸಸ್ಯ ಪ್ರಭೇದಗಳ ಅಂತರರಾಷ್ಟ್ರೀಯ ವ್ಯಾಪಾರ ಒಪ್ಪಂದದ (CITES) ಮಾಜಿ ಪ್ರಧಾನ ಕಾರ್ಯದರ್ಶಿ ಹಾಗೂ ಖ್ಯಾತ ಪರಿಸರವಾದಿ. ಇವರನ್ನು 2026ರ ಆಗಸ್ಟ್‌ನಲ್ಲಿ ಸ್ವತಂತ್ರ ಅಧ್ಯಕ್ಷರಾಗಿ ನೇಮಿಸಲಾಗಿದೆ.
ಗೌರವಾನ್ವಿತ ನ್ಯಾಯಮೂರ್ತಿ ಕೃಷ್ಣ ಮುರಾರಿ: ಸುಪ್ರೀಂ ಕೋರ್ಟ್‌ನ ಮಾಜಿ ನ್ಯಾಯಾಧೀಶರು ಮತ್ತು ಪಂಜಾಬ್ ಹಾಗೂ ಹರಿಯಾಣ ಹೈಕೋರ್ಟ್‌ನ ಮಾಜಿ ಮುಖ್ಯ ನ್ಯಾಯಮೂರ್ತಿಗಳು. ಇವರು ಕಾನೂನು, ಆಡಳಿತ ಮತ್ತು ಸಾಂಸ್ಥಿಕ ಮೇಲ್ವಿಚಾರಣೆಯಲ್ಲಿ ವ್ಯಾಪಕ ಅನುಭವ ಹೊಂದಿದ್ದಾರೆ.
ಕ್ರೇಗ್ ಹೂವರ್ (Mr Craig Hoover): ಅಮೆರಿಕದ ಪ್ರಾಣಿ ಸಂಗ್ರಹಾಲಯಗಳ ಮತ್ತು ಅಕ್ವೇರಿಯಂಗಳ ಸಂಘದ (AZA) ಕಾರ್ಯನಿರ್ವಾಹಕ ಉಪಾಧ್ಯಕ್ಷರು. ಇವರು ಅಮೆರಿಕದ ಮೀನು ಮತ್ತು ವನ್ಯಜೀವಿ ಸೇವೆಯಲ್ಲಿ ಹಿರಿಯ ಪಾತ್ರಗಳನ್ನು ನಿರ್ವಹಿಸುವುದೂ ಸೇರಿದಂತೆ ಮೂರು ದಶಕಗಳ ವನ್ಯಜೀವಿ ಸಂರಕ್ಷಣೆಯ ಅನುಭವ ಹೊಂದಿದ್ದು, AZA ಜೊತೆಗಿನ ಅಧಿಕಾರಾವಧಿ ಪೂರ್ಣಗೊಂಡ ನಂತರ 2027ರ ಜನವರಿಯಲ್ಲಿ ಅಧಿಕಾರ ಸ್ವೀಕರಿಸಲಿದ್ದಾರೆ.
ಸುಭಾಷ್ ಕೆ. ಮಲ್ಕೇಡೆ (Mr Subhash K. Malkhede): ಹಿರಿಯ ಭಾರತೀಯ ಅರಣ್ಯ ಸೇವೆಯ (IFS) ಅಧಿಕಾರಿ ಹಾಗೂ ಕರ್ನಾಟಕದ ಮಾಜಿ ಮುಖ್ಯ ವನ್ಯಜೀವಿ ವಾರ್ಡನ್. ಇವರು ವನ್ಯಜೀವಿ ಸಂರಕ್ಷಣೆ, ಸಂರಕ್ಷಿತ ಪ್ರದೇಶಗಳು, ಅಳಿವಿನಂಚಿನಲ್ಲಿರುವ ಪ್ರಭೇದಗಳ ನಿರ್ವಹಣೆ ಮತ್ತು ವನ್ಯಜೀವಿ ಕಾನೂನು ಜಾರಿಯಲ್ಲಿ ಪರಿಣತಿ ಹೊಂದಿದ್ದಾರೆ.
ಗ್ರೆಟಾ ಎಫ್. ಐೋರಿ (Ms Greta F. Iori): ಆಫ್ರಿಕಾದಾದ್ಯಂತ ವನ್ಯಜೀವಿ ಅಪರಾಧ, ಮಾನವ-ವನ್ಯಜೀವಿ ಸಹಬಾಳ್ವೆ ಮತ್ತು ಸಮುದಾಯ ಆಧಾರಿತ ಸಂರಕ್ಷಣೆಯಲ್ಲಿ ಗಮನಾರ್ಹ ಅನುಭವ ಹೊಂದಿರುವ ಇಥಿಯೋಪಿಯನ್-ಇಟಾಲಿಯನ್ ಸಂರಕ್ಷಣಾ ತಜ್ಞೆ.
ಡಾ. ಕುಶಲ್ ಕೊನ್ವರ್ ಶರ್ಮಾ (Dr Kushal Konwar Sarma - ಪದನಿಮಿತ್ತ ಮತದಾನೇತರ ಸದಸ್ಯ): ಖ್ಯಾತ ಭಾರತೀಯ ವನ್ಯಜೀವಿ ಪಶುವೈದ್ಯ ಮತ್ತು ಆನೆ ತಜ್ಞರು. ಇವರು ಗುವಾಹಟಿಯ ಪಶುವೈದ್ಯಕೀಯ ವಿಜ್ಞಾನ ಕಾಲೇಜಿನ ಶಸ್ತ್ರಚಿಕಿತ್ಸೆ ಮತ್ತು ರೇಡಿಯಾಲಜಿ ವಿಭಾಗದ ಮಾಜಿ ಪ್ರಾಧ್ಯಾಪಕ ಹಾಗೂ ಮುಖ್ಯಸ್ಥರಾಗಿದ್ದಾರೆ.
ಮಂಡಳಿಯ ಪ್ರಮುಖ ಜವಾಬ್ದಾರಿಗಳು ಮತ್ತು ಸುಧಾರಣೆಗಳು:
ಮಂಡಳಿಯ ಸದಸ್ಯರು ಸ್ವತಂತ್ರ ವೈಯಕ್ತಿಕ ಸಾಮರ್ಥ್ಯದಲ್ಲಿ ಸೇವೆ ಸಲ್ಲಿಸುತ್ತಾರೆ ಮತ್ತು ವಂತಾರಾ ಉದ್ಯೋಗಿಗಳು ಮಂಡಳಿಯಲ್ಲಿ ಮತದಾನ ಮಾಡುವ ಸದಸ್ಯರಾಗಲು ಅವಕಾಶವಿರುವುದಿಲ್ಲ. ವಂತಾರದ ಇತ್ತೀಚಿನ ಆಡಳಿತ ಸುಧಾರಣೆಗಳ ಪ್ರಕಾರ, 2027ರ ಜೂನ್ 5ಕ್ಕಿಂತ ಮೊದಲು ಪ್ರಾಣಿಯನ್ನು ಆಮದು ಮಾಡಿಕೊಳ್ಳಲು ಯಾವುದೇ ಅರ್ಜಿ ಸಲ್ಲಿಸಲಾಗುವುದಿಲ್ಲ. ತದನಂತರವೂ ಮಂಡಳಿಯ ಪೂರ್ವ ಲಿಖಿತ ಅನುಮೋದನೆ ಮತ್ತು ಕಠಿಣ ಆಂತರಿಕ ಪರಿಶೀಲನೆಯಿಲ್ಲದೆ ಯಾವುದೇ ಅರ್ತಿಯನ್ನು ಮುಂದುವರಿಸಲು ಬರುವುದಿಲ್ಲ.
ಭಾರತೀಯ ಕಾನೂನು, CITES ಮತ್ತು ಇತರ ಅಂತರರಾಷ್ಟ್ರೀಯ ಒಪ್ಪಂದಗಳ ಅನುಸರಣೆಯನ್ನು ಖಚಿತಪಡಿಸಿಕೊಳ್ಳಲು ಹಾಗೂ ವಂತಾರಾದ ರಕ್ಷಣೆ ಮತ್ತು ಪುನರ್ವಸತಿ ಕಾರ್ಯಗಳನ್ನು ಮೇಲ್ವಿಚಾರಣೆ ಮಾಡಲು ಈ ಮಂಡಳಿಯು ಅತ್ಯುನ್ನತ ಆಡಳಿತ ಮಂಡಳಿಯಾಗಿ ಕಾರ್ಯನಿರ್ವಹಿಸಲಿದೆ.
ಆಡಳಿತ ಮಂಡಳಿಯ ಅಧ್ಯಕ್ಷರಾದ ಜಾನ್ ಸ್ಕ್ಯಾನ್ಲಾನ್ ಮಾತನಾಡಿ, "ವಂತಾರದ ಭವಿಷ್ಯದ ದೂರದೃಷ್ಟಿಯನ್ನು ರೂಪಿಸುವಲ್ಲಿ ಮತ್ತು ಇತ್ತೀಚೆಗೆ ಘೋಷಿಸಲಾದ ಬದಲಾವಣೆಗಳನ್ನು ದೈನಂದಿನ ಕಾರ್ಯಾಚರಣೆಯಲ್ಲಿ ಅಳವಡಿಸಿಕೊಳ್ಳುವುದನ್ನು ಖಚಿತಪಡಿಸಿಕೊಳ್ಳುವಲ್ಲಿ ಆಡಳಿತ ಮಂಡಳಿಯು ಕೇಂದ್ರ、ಕಾರ್ಯ ನಿರ್ವಹಿಸಲಿದೆ" ಎಂದು ತಿಳಿಸಿದ್ದಾರೆ.
ವಂತಾರಾದ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ (CEO) ವಿವಾನ್ ಕರಾಣಿ ಅವರು ಮಾತನಾಡಿ, "ವಿಜ್ಞಾನ ಆಧಾರಿತ ಸಂರಕ್ಷಣೆಯನ್ನು ನಾವು ಮುನ್ನಡೆಸುತ್ತಿದ್ದಂತೆ, ವಂತಾರಾವನ್ನು ಅತ್ಯುನ್ನತ ಮಾನದಂಡಗಳಿಗೆ ಒಳಪಡಿಸುವಲ್ಲಿ ಪ್ರಮುಖ ಪಾತ್ರ ವಹಿಸಲಿರುವ ಆಡಳಿತ ಮಂಡಳಿಯ ಸದಸ್ಯರನ್ನು ನಾನು ಸ್ವಾಗತಿಸುತ್ತೇನೆ" ಎಂದಿದ್ದಾರೆ.