ಚಂಡೀಗಡ,ಆಗಸ್ಟ್ 30: ದುಷ್ಕರ್ಮಿಗಳಿಂದ ಅಪಹರಣಕ್ಕೊಳಗಾಗಿ ಮರಕ್ಕೆ ಕಟ್ಟಿಹಾಕಿ ಬೆಂಕಿ ಹಚ್ಚಲ್ಪಟ್ಟು, ಕ್ರೂರ ಹಿಂಸೆಗೆ ತುತ್ತಾಗಿದ್ದ ಪಂಜಾಬಿ ಯೂಟ್ಯೂಬರ್ ಮಂಜೀತ್ ಕೌರ್ ಅವರು ಚಿಕಿತ್ಸೆ ಫಲಕಾರಿಯಾಗದೆ ಪಿಜಿಐಎಂಇಆರ್ (PGIMER) ಆಸ್ಪತ್ರೆಯಲ್ಲಿ ನಿಧನರಾಗಿದ್ದಾರೆ.
ಚಂಡೀಗಡದ ಸೆಕ್ಟರ್ 19ರ ನಿವಾಸಿಯಾಗಿದ್ದ ಮಂಜೀತ್ ಕೌರ್ ಅವರನ್ನು ಜುಲೈ 3 ಮತ್ತು 4ರ ಮಧ್ಯರಾತ್ರಿ ಪರಿಚಯಸ್ಥರಾದ ಶುಭಿ ಮತ್ತು ಪಿಂಡಾ ಎನ್ನುವವರು ಸೆಕ್ಟರ್ 34ಕ್ಕೆ ಕರೆಸಿಕೊಂಡಿದ್ದರು. ಬಳಿಕ ಅವರ ಮೇಲೆ ಹಲ್ಲೆ ನಡೆಸಿ, ಬಲವಂತವಾಗಿ ವಾಹನದಲ್ಲಿ ಅಪಹರಿಸಿ ಪಂಜಾಬ್‌ನ ಮೊರಿಂಡಾ ಸಮೀಪದ ಅರಣ್ಯ ಪ್ರದೇಶಕ್ಕೆ ಕರೆದೊಯ್ದು ಈ ಕೃತ್ಯ ಎಸಗಿದ್ದಾರೆ ಎಂದು ಮೃತರ ತಾಯಿ ಕಾಂತಾದೇವಿ ದೂರು ನೀಡಿದ್ದಾರೆ.
ಆರೋಪಿಗಳು ಕೌರ್ ಅವರನ್ನು ಮರಕ್ಕೆ ಕಟ್ಟಿಹಾಕಿ ಬೆಂಕಿ ಹಚ್ಚಿ ಪರಾರಿಯಾಗಿದ್ದು, ನಂತರ ಮತ್ತೊಬ್ಬ ಪರಿಚಯಸ್ಥರು ಅಲ್ಲಿಗೆ ತಲುಪಿ ಕಂಬಳಿಯಿಂದ ಬೆಂಕಿಯನ್ನು ನಂದಿಸಿದ್ದರು. ಮೊರಿಂಡಾ ಆಸ್ಪತ್ರೆ ಹಾಗೂ ಮೊಹಾಲಿಯ ಮ್ಯಾಕ್ಸ್ ಆಸ್ಪತ್ರೆಯಲ್ಲಿ ಪ್ರಾಥಮಿಕ ಚಿಕಿತ್ಸೆ ಪಡೆದ ಬಳಿಕ ಅವರನ್ನು ಚಂಡೀಗಡದ ಪಿಜಿಐಎಂಇಆರ್‌ಗೆ ದಾಖಲಿಸಲಾಗಿತ್ತು.
ಪೊಲೀಸರ ನಿರ್ಲಕ್ಷ್ಯದ ಆರೋಪ ಹಾಗೂ ತನಿಖೆ:
ಚಿಕಿತ್ಸೆಯ ಸಮಯದಲ್ಲಿ ಪ್ರಜ್ಞೆ ಬಂದಾಗ ಮಂಜೀತ್ ತಮ್ಮ ಹೇಳಿಕೆಯನ್ನು ದಾಖಲಿಸಲು ಬಯಸಿದ್ದರೂ, ಆಕೆ ಪ್ರಜ್ಞಾವಸ್ಥೆಯಲ್ಲಿದ್ದು ಹೇಳಿಕೆ ನೀಡಲು ಸಿದ್ಧರಿದ್ದರೂ ಪೊಲೀಸರು ಆಸ್ಪತ್ರೆಗೆ ಭೇಟಿ ನೀಡಿರಲಿಲ್ಲ ಎಂಬ ಗಂಭೀರ ಆರೋಪ ಕೇಳಿಬಂದಿದೆ. ಆಸ್ಪತ್ರೆ ಹಾಗೂ ಪಿಜಿಐ ಪೊಲೀಸ್ ಪೋಸ್ಟ್‌ನಿಂದ ಮಾಹಿತಿ ನೀಡಿದ್ದರೂ, ಸುಮಾರು ಎರಡು ತಿಂಗಳ ಕಾಲ ಯಾವುದೇ ಎಫ್‌ಐಆರ್ ದಾಖಲಿಸಿರಲಿಲ್ಲ.
ಮಂಜೀತ್ ಸಾವಿನ ಬಳಿಕ ಎಚ್ಚೆತ್ತ ಪೊಲೀಸರು, ತಾಯಿಯ ದೂರಿನ ಮೇರೆಗೆ ಬುಧವಾರ ರಾತ್ರಿ ಚಂಡೀಗಡದ ಸೆಕ್ಟರ್ 34 ಪೊಲೀಸ್ ಠಾಣೆಯಲ್ಲಿ ಅಪಹರಣ ಮತ್ತು ಕೊಲೆ ಪ್ರಕರಣ ದಾಖಲಿಸಿದ್ದಾರೆ. ಚಂಡೀಗಡ ಪೊಲೀಸರು ಸೆಕ್ಟರ್ 34ರ ಸುತ್ತಲಿನ ಸಿಸಿಟಿವಿ ತುಣುಕುಗಳು ಹಾಗೂ ಟೋಲ್ ಪ್ಲಾಜಾ ಕ್ಯಾಮೆರಾ ದೃಶ್ಯಾವಳಿಗಳ ಆಧಾರದ ಮೇಲೆ ತನಿಖೆಯನ್ನು ಮುಂದುವರೆಸಿದ್ದಾರೆ.