ಮೈಸೂರು,ಆಗಸ್ಟ್ 30: ಮೈಸೂರು ವಿಭಾಗದ ರೈಲ್ವೆ ರಕ್ಷಣಾ ಪಡೆ (ಆರ್‌ಪಿಎಫ್) ಸಿಬ್ಬಂದಿ ಕಾರ್ಯಾಚರಣೆ ನಡೆಸಿ, ಅಶೋಕಪುರಂ ಯಾರ್ಡ್‌ನಲ್ಲಿ ರೈಲ್ವೆ ಆಸ್ತಿ ಕಳ್ಳತನ ಮಾಡಿದ್ದ ವ್ಯಕ್ತಿಯೊಬ್ಬನನ್ನು ಪತ್ತೆಹಚ್ಚಿದ್ದಾರೆ. ಇದರೊಂದಿಗೆ ಮತ್ತೊಂದು ಘಟನೆಯಲ್ಲಿ 'ಆಪರೇಷನ್ ಅಮಾನತ್' ಅಡಿಯಲ್ಲಿ ರೈಲಿನಲ್ಲಿ ಕಳೆದುಹೋಗಿದ್ದ ಪ್ರಯಾಣಿಕರ ಮೊಬೈಲ್ ಫೋನ್ ಅನ್ನು ಪತ್ತೆಮಾಡಿ ಸುರಕ್ಷಿತವಾಗಿ ಹಸ್ತಾಂತರಿಸಿದ್ದಾರೆ.
ಪ್ರಕರಣ 1: ರೈಲ್ವೆ ಆಸ್ತಿ ಕಳ್ಳತನ ಪತ್ತೆ
ಆಗಸ್ಟ್ 26 ಮತ್ತು 27ರ ಮಧ್ಯರಾತ್ರಿ ಅಶೋಕಪುರಂ ಯಾರ್ಡ್‌ನಲ್ಲಿ ಕರ್ತವ್ಯದಲ್ಲಿದ್ದ ಆರ್‌ಪಿಎಫ್ ಕಾನ್ಸ್‌ಟೇಬಲ್ ಶ್ರೀ ಮುಜಮ್ಮಿಲ್ ಖಾನ್, ವ್ಯಕ್ತಿಯೊಬ್ಬ ವಿದ್ಯುತ್ ಮೋಟಾರ್‌ನೊಂದಿಗೆ ಅನುಮಾನಾಸ್ಪದವಾಗಿ ಓಡಾಡುತ್ತಿರುವುದನ್ನು ಗಮನಿಸಿದರು. ಆ ವ್ಯಕ್ತಿ ತಪ್ಪಿಸಿಕೊಳ್ಳಲು ಯತ್ನಿಸಿದಾಗ, ತಕ್ಷಣವೇ ಮೈಸೂರು ಆರ್‌ಪಿಎಫ್ ಪೋಸ್ಟ್ ಕಮಾಂಡರ್ ಶ್ರೀ ದಿನೇಶ್ ಕುಮಾರ್ ಅವರಿಗೆ ಮಾಹಿತಿ ನೀಡಿ ಹಿಂಬಾಲಿಸಿದರು. ಸ್ಥಳಕ್ಕೆ ಧಾವಿಸಿದ ಆರ್‌ಪಿಎಫ್ ತಂಡವು ಆತನನ್ನು ವಶಕ್ಕೆ ಪಡೆಯಿತು.
ವಿಚಾರಣೆಯಿಂದ ಆತ ಬಿಹಾರ ಮೂಲದ ಆಶಿಶ್ (26) ಎಂದು ಗುರುತಿಸಲ್ಪಟ್ಟಿದ್ದಾನೆ. ಅಶೋಕಪುರಂ ನಿಲ್ದಾಣದಲ್ಲಿದ್ದ ಬಳಕೆಯಲ್ಲಿಲ್ಲದ ರೈಲ್ವೆ ಬೋಗಿಯಿಂದ ಸುಮಾರು ₹4,000 ಮೌಲ್ಯದ ವಿದ್ಯುತ್ ಮೋಟಾರ್ ಅನ್ನು ಆತ ಕಳವು ಮಾಡಿರುವುದು ತಿಳಿದುಬಂದಿದೆ. ಈ ಕುರಿತು ಪ್ರಕರಣ ದಾಖಲಿಸಿ ಮುಂದಿನ ಕಾನೂನು ಕ್ರಮ ಕೈಗೊಳ್ಳಲಾಗಿದೆ.
ಪ್ರಕರಣ 2: 'ಆಪರೇಷನ್ ಅಮಾನತ್' ಮೂಲಕ ಮೊಬೈಲ್ ಮರುಪಾವತಿ
ಆಗಸ್ಟ್ 27ರಂದು ಚೆನ್ನೈ–ಮೈಸೂರು ಎಕ್ಸ್‌ಪ್ರೆಸ್ (ರೈಲು ಸಂಖ್ಯೆ 16021) ಮೈಸೂರು ನಿಲ್ದಾಣಕ್ಕೆ ಆಗಮಿಸಿದ ಬಳಿಕ, ಪ್ರಯಾಣಿಕರೊಬ್ಬರು ತಮ್ಮ ಮೊಬೈಲ್ ಫೋನ್ ಅನ್ನು ರೈಲಿನಲ್ಲೇ ಬಿಟ್ಟುಹೋಗಿರುವ ಬಗ್ಗೆ ಆರ್‌ಪಿಎಫ್‌ಗೆ ಮಾಹಿತಿ ಲಭಿಸಿತು.
ತಕ್ಷಣ ಕಾರ್ಯಪ್ರವೃತ್ತರಾದ ಹೆಡ್ ಕಾನ್ಸ್‌ಟೇಬಲ್ ಶ್ರೀ ರುದ್ರಮೂರ್ತಿ ಅವರು ಬೋಗಿಯನ್ನು ಪರಿಶೀಲಿಸಿ ಮೊಬೈಲ್ ಫೋನ್ ಪತ್ತೆಹಚ್ಚಿದರು. ಬಳಿಕ ಸಬ್‌ಇನ್‌ಸ್ಪೆಕ್ಟರ್ ಶ್ರೀಮತಿ ನಮಿತಾ ಎ.ವಿ. ಅವರು ಪ್ರಯಾಣಿಕರನ್ನು ಸಂಪರ್ಕಿಸಿ ಮಾಹಿತಿ ನೀಡಿದರು. ಸುಮಾರು ₹10,000 ಮೌಲ್ಯದ ಮೊಬೈಲ್ ಫೋನ್ ಅನ್ನು ಸೂಕ್ತ ಗುರುತಿನ ಪರಿಶೀಲನೆಯ ನಂತರ ಚೆನ್ನೈ ನಿವಾಸಿ ಶ್ರೀಮತಿ ಕೆ. ಜಯಲಕ್ಷ್ಮಿ (44) ಅವರಿಗೆ ಹಸ್ತಾಂತರಿಸಲಾಯಿತು.
ಆರ್‌ಪಿಎಫ್ ಸಿಬ್ಬಂದಿಯ ಈ ಜಾಗರೂಕತೆ, ರೈಲ್ವೆ ಆಸ್ತಿ ರಕ್ಷಣೆ ಹಾಗೂ ಪ್ರಯಾಣಿಕರ ಸೇವೆಯ ಕರ್ತವ್ಯನಿಷ್ಠೆಗೆ ಸಾರ್ವಜನಿಕರಿಂದ ವ್ಯಾಪಕ ಮೆಚ್ಚುಗೆ ವ್ಯಕ್ತವಾಗಿದೆ.