ಮಂಗಳೂರು, ಆಗಸ್ಟ್ 18 : ಭಾರತೀಯ ಮಜೂರ್ ಸಂಘ (BMS) ವತಿಯಿಂದ ದೇಶದ ಕಾರ್ಮಿಕರ ದೀರ್ಘಕಾಲದ ನ್ಯಾಯಯುತ ಬೇಡಿಕೆಗಳ ಈಡೇರಿಕೆಗಾಗಿ ದೇಶವ್ಯಾಪಿ ಪ್ರತಿಭಟನೆಯ ಕರೆ ನೀಡಲಾಗಿದ್ದು, ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ಮಂಗಳೂರಿನ ಟೌನ್ ಹಾಲ್ ಮುಂಭಾಗದಲ್ಲಿ ಬೃಹತ್ ಪ್ರತಿಭಟನೆ ಯಶಸ್ವಿಯಾಗಿ ನಡೆಯಿತು.
ನಾಗರ ಪಂಚಮಿ ಧಾರ್ಮಿಕ ಆಚರಣೆಯ ಹಿನ್ನೆಲೆಯಲ್ಲಿ ಹಮ್ಮಿಕೊಳ್ಳಲಾಗಿದ್ದ ಈ ಪ್ರತಿಭಟನೆಯಲ್ಲಿ ದಕ್ಷಿಣ ಕನ್ನಡ ಜಿಲ್ಲೆಯ ಕಟ್ಟಡ, ಆಟೋ-ರಿಕ್ಷಾ, ಆಶಾ, ಅಂಗನವಾಡಿ, ಬೀಡಿ, ರಬ್ಬರ್, ಕೃಷಿ-ತೋಟಗಾರಿಕೆ, ಬ್ಯಾಂಕ್, ಎಂಆರ್‌ಪಿಎಲ್, ಎನ್‌ಎಂಪಿಟಿ, ಕೆಐಒಸಿಎಲ್-ಕುದುರೆಮುಖ, ಕೆಎಸ್‌ಆರ್‌ಟಿಸಿ, ಮೀನುಗಾರಿಕೆ, ಹೋಟೆಲ್, ಆಸ್ಪತ್ರೆ, ಪತ್ರಿಕಾ-ಮಾಧ್ಯಮ, ಟೆಲಿಕಾಂ, ಸಣ್ಣ ಕೈಗಾರಿಕೆ, ಗೋದಾಮು, ಗುತ್ತಿಗೆ-ಹೊರಗುತ್ತಿಗೆ ಹಾಗೂ ಅಸಂಘಟಿತ ಸೇರಿದಂತೆ ವಿವಿಧ ವಲಯಗಳ ನೂರಾರು ಕಾರ್ಮಿಕರು ಭಾಗವಹಿಸಿ ತಮ್ಮ ಆಕ್ರೋಶ ಹಾಗೂ ಬೇಡಿಕೆಗಳನ್ನು ವ್ಯಕ್ತಪಡಿಸಿದರು.
ಪ್ರಮುಖ ರಾಷ್ಟ್ರೀಯ ಬೇಡಿಕೆಗಳು
ಕನಿಷ್ಠ ವೇತನ: ರಾಷ್ಟ್ರೀಯ ಕನಿಷ್ಠ ಮಾಸಿಕ ವೇತನವನ್ನು ರೂ. 30,000ಕ್ಕೆ ನಿಗದಿಪಡಿಸಬೇಕು.
ಇಎಸ್‌ಐಸಿ ಹಾಗೂ ಇಪಿಎಫ್: ಇಎಸ್‌ಐಸಿ ವೇತನ ಮಿತಿಯನ್ನು ರೂ. 42,000ಕ್ಕೆ ಮತ್ತು ಇಪಿಎಫ್ ವೇತನ ಮಿತಿಯನ್ನು ರೂ. 30,000ಕ್ಕೆ ಹೆಚ್ಚಿಸಬೇಕು.
ಪಿಂಚಣಿ ಹಾಗೂ ಗ್ರಾಚ್ಯುಟಿ: ಇಪಿಎಸ್-95 ಕನಿಷ್ಠ ಪಿಂಚಣಿಯನ್ನು ರೂ. 7,500ಕ್ಕೆ ಹೆಚ್ಚಿಸಿ ಡಿಎ ಹಾಗೂ ಸಮಗ್ರ ವೈದ್ಯಕೀಯ ಸೌಲಭ್ಯ ಕಲ್ಪಿಸಬೇಕು. ಗ್ರಾಚ್ಯುಟಿ ಗರಿಷ್ಠ ಮಿತಿಯನ್ನು ರೂ. 40 ಲಕ್ಷಕ್ಕೆ ಏರಿಸಬೇಕು.
ಯೋಜನಾ ನೌಕರರು: ಆಶಾ, ಅಂಗನವಾಡಿ, ಅಕ್ಷರ ದಾಸೋಹ ಹಾಗೂ ಎನ್‌ಎಚ್‌ಎಂ ನೌಕರರ ಗೌರವಧನ ಹೆಚ್ಚಿಸಿ ಸಾಮಾಜಿಕ ಭದ್ರತೆ ನೀಡಬೇಕು.
ಸಮಾನ ಕೆಲಸಕ್ಕೆ ಸಮಾನ ವೇತನ: ಗುತ್ತಿಗೆ ಹಾಗೂ ಹೊರಗುತ್ತಿಗೆ ಕಾರ್ಮಿಕರಿಗೆ ಪಿಎಫ್, ಇಎಸ್‌ಐ ಹಾಗೂ ಉದ್ಯೋಗ ಭದ್ರತೆ ಖಚಿತಪಡಿಸಬೇಕು.
ವಿವಿಧ ವಲಯಗಳ ಸ್ಥಳೀಯ ಬೇಡಿಕೆಗಳು
ಕಟ್ಟಡ ಕಾರ್ಮಿಕರು: ಮರಳು ಮತ್ತು ಕೆಂಪುಕಲ್ಲಿನ ಸಮರ್ಪಕ ಸರಬರಾಜು, ದರ ನಿಯಂತ್ರಣ ಹಾಗೂ ಕಲ್ಯಾಣ ಸೌಲಭ್ಯಗಳನ್ನು ಪರಿಣಾಮಕಾರಿಯಾಗಿ ಜಾರಿಗೊಳಿಸಬೇಕು.
ಸಾರಿಗೆ ಕಾರ್ಮಿಕರು: ಆಟೋ-ರಿಕ್ಷಾ ಮತ್ತು ಕ್ಯಾಬ್‌ಗಳಿಗೆ ನ್ಯಾಯಯುತ ಬಾಡಿಗೆ ದರ, ಪಿಂಚಣಿ, ವಿಮೆ ಹಾಗೂ ಅಧಿಕೃತ ನಿಲ್ದಾಣಗಳನ್ನು ಒದಗಿಸಬೇಕು.
ಕೃಷಿ ಮತ್ತು ತೋಟಗಾರಿಕೆ: ರಬ್ಬರ್ ಟ್ಯಾಪಿಂಗ್ ದರ ಪರಿಷ್ಕರಣೆ, ವಿಮೆ ಮತ್ತು ಸಾಮಾಜಿಕ ಭದ್ರತೆ ಕಲ್ಪಿಸಬೇಕು.
ಕೈಗಾರಿಕಾ ಮತ್ತು ಸಾರ್ವಜನಿಕ ವಲಯ: ಎಂಆರ್‌ಪಿಎಲ್, ಎನ್‌ಎಂಪಿಟಿ, ಕೆಐಒಸಿಎಲ್ ಹಾಗೂ ಕೆಎಸ್‌ಆರ್‌ಟಿಸಿಯಲ್ಲಿ ಅಗತ್ಯ ಖಾಲಿ ಹುದ್ದೆಗಳನ್ನು ಭರ್ತಿ ಮಾಡಿ, ವೇತನ ಪರಿಷ್ಕರಣೆ ಹಾಗೂ ಸುರಕ್ಷಿತ ಕೆಲಸದ ವಾತಾವರಣ ನಿರ್ಮಿಸಬೇಕು.
ಸರ್ಕಾರಗಳಿಗೆ ಮನವಿ ಸಲ್ಲಿಕೆ
ಪ್ರತಿಭಟನೆಯ ನಂತರ ಕೇಂದ್ರ ಹಾಗೂ ರಾಜ್ಯ ಸರ್ಕಾರಗಳಿಗೆ ದಕ್ಷಿಣ ಕನ್ನಡ ಜಿಲ್ಲಾಧಿಕಾರಿಗಳ ಮೂಲಕ ಹಾಗೂ ಸ್ಥಳೀಯ ಸಂಸದರಿಗೆ ಪ್ರತ್ಯೇಕ ಮನವಿಗಳನ್ನು ಸಲ್ಲಿಸಲಾಯಿತು. ಹಿಂದಿನ ಸರ್ಕಾರ ಕೈಗೊಂಡ ಕನಿಷ್ಠ ವೇತನ ಹೆಚ್ಚಳದ ನಿರ್ಧಾರವನ್ನು ಸ್ವಾಗತಿಸಿದ ಬಿಎಂಎಸ್, ಯಾವುದೇ ಕಾರಣಕ್ಕೂ ಕನಿಷ್ಠ ವೇತನವನ್ನು ಕಡಿತಗೊಳಿಸಬಾರದು ಹಾಗೂ ಬೆಲೆ ಏರಿಕೆಗೆ ತಕ್ಕಂತೆ ಕಾಲಕಾಲಕ್ಕೆ ಪರಿಷ್ಕರಿಸಬೇಕು ಎಂದು ಆಗ್ರಹಿಸಿದೆ.
ಬಿಎಂಎಸ್ ಹಿರಿಯ ಪ್ರಮುಖರಾದ ವಿಶ್ವನಾಥ್ ಶೆಟ್ಟಿ ಅವರ ಮಾರ್ಗದರ್ಶನದಲ್ಲಿ ನಡೆದ ಈ ಪ್ರತಿಭಟನೆಯಲ್ಲಿ ಸತೀಶ್ ಶೆಟ್ಟಿ, ಅನಿಲ್ ಕುಮಾರ್ ಯು, ಗೋಪಾಲಕೃಷ್ಣ, ರೋಹಿತಾಶ್ವ, ಜಯರಾಜ್ ಸಾಲಿಯಾನ್, ವಸಂತ ಕುಮಾರ್ ಮಣಿಹಳ್ಳ, ನಳಿನಿ ಅಡ್ಯಾರ್, ಉದಯ ಕುಮಾರ್ ಬಿ.ಸಿ., ಕುಮಾರನಾಥ ಶೆಟ್ಟಿ ಕಲ್ಮಂಜ, ಭಗವಾನ್ ದಾಸ್, ವಿಶ್ವೇಶ್, ಗೀತಾ ಧರ್ಮರಾಜ್, ತುಳಸಿ ದೇವರಾಜ್, ಡೀಲಾಕ್ಷಿ, ಪುರಂದರ ಶೆಟ್ಟಿ ಸೇರಿದಂತೆ ವಿವಿಧ ಯೂನಿಯನ್‌ಗಳ ಪ್ರಮುಖರು ಮತ್ತು ಪದಾಧಿಕಾರಿಗಳು ಉಪಸ್ಥಿತರಿದ್ದರು.