e coli bacteria in railway station ರೈಲು ನಿಲ್ದಾಣಗಳ ಕುಡಿಯುವ ನೀರಿನಲ್ಲಿ 'ಇ.ಕೋಲಿ' ಬ್ಯಾಕ್ಟೀರಿಯಾ ಪತ್ತೆ, ಸಿಎಜಿ ವರದಿಯಿಂದ ಆತಂಕಕಾರಿ ಮಾಹಿತಿ ಬಹಿರಂಗ

ನವದೆಹಲಿ, ಆಗಸ್ಟ್ 17 :  ದೇಶದ ರೈಲ್ವೆ ನಿಲ್ದಾಣಗಳಲ್ಲಿ ಪ್ರಯಾಣಿಕರಿಗೆ ಒದಗಿಸಲಾಗುತ್ತಿರುವ ಸೌಲಭ್ಯಗಳು ಮತ್ತು ಕುಡಿಯುವ ನೀರಿನ ಗುಣಮಟ್ಟದ ಕುರಿತು ಕಂಟ್ರೋಲರ್ ಅಂಡ್ ಆಡಿಟರ್ ಜನರಲ್ (CAG) ನಡೆಸಿರುವ ಇತ್ತೀಚಿನ ಅಧ್ಯಯನ ವರದಿಯಲ್ಲಿ ಕೆಲ ಗಂಭೀರ ಲೋಪಗಳು ಬೆಳಕಿಗೆ ಬಂದಿವೆ.

ಸಿಎಜಿ ನಡೆಸಿದ ಅಧ್ಯಯನದಲ್ಲಿ ಭಾರತೀಯ ರೈಲ್ವೆಯ ವಿವಿಧ ವಲಯಗಳ 512 ನಾನ್-ಸಬರ್ಬನ್ (ಉಪನಗರವಲ್ಲದ) ರೈಲ್ವೆ ನಿಲ್ದಾಣಗಳ ಪ್ರಯಾಣಿಕರ ಸೌಲಭ್ಯಗಳನ್ನು ಪರಿಶೀಲಿಸಲಾಗಿದೆ. ಈ ಪೈಕಿ ನಾಲ್ಕು ರೈಲ್ವೆ ವಲಯಗಳಿಗೆ ಸೇರಿದ 8 ನಿಲ್ದಾಣಗಳ ವಾಟರ್ ಕೂಲರ್‌ಗಳ ನೀರಿನ ಮಾದರಿಗಳಲ್ಲಿ ಹಾನಿಕಾರಕ 'ಇ.ಕೋಲಿ' (E. coli) ಬ್ಯಾಕ್ಟೀರಿಯಾ ಇರುವುದು ದೃಢಪಟ್ಟಿದೆ.

ಯಾವೆಲ್ಲಾ ನಿಲ್ದಾಣಗಳಲ್ಲಿ ಪತ್ತೆ?

ಸಿಎಜಿ ವರದಿ ಪ್ರಕಾರ, ದಕ್ಷಿಣ ರೈಲ್ವೆ ವ್ಯಾಪ್ತಿಯ ಕೊಯಮತ್ತೂರು ಮತ್ತು ಪಾಲಕ್ಕಾಡ್ ಜಂಕ್ಷನ್, ದಕ್ಷಿಣ ಮಧ್ಯ ರೈಲ್ವೆ ವ್ಯಾಪ್ತಿಯ ಹೈದರಾಬಾದ್, ಮಧ್ಯ ರೈಲ್ವೆ ವ್ಯಾಪ್ತಿಯ ಛತ್ರಪತಿ ಶಿವಾಜಿ ಮಹಾರಾಜ್ ಟರ್ಮಿನಸ್ (CSMT), ಭಿವಂಡಿ ರೋಡ್, ಕಲ್ಯಾಣ್ ಮತ್ತು ಲೋನಾವಾಲಾ, ಹಾಗೂ ಪೂರ್ವ ರೈಲ್ವೆ ವ್ಯಾಪ್ತಿಯ ಮಧುಪುರ ನಿಲ್ದಾಣಗಳ ವಾಟರ್ ಕೂಲರ್‌ಗಳಿಂದ ಸಂಗ್ರಹಿಸಿದ ನೀರಿನ ಮಾದರಿಗಳಲ್ಲಿ ಈ ಬ್ಯಾಕ್ಟೀರಿಯಾ ಪತ್ತೆಯಾಗಿದೆ.

ಈ ಇ.ಕೋಲಿ ಬ್ಯಾಕ್ಟೀರಿಯಾದ ತಳಿಗಳು ಕಲುಷಿತ ಆಹಾರ ಮತ್ತು ನೀರಿನ ಮೂಲಕ ಸೋಂಕು ಉಂಟುಮಾಡಿ, ತೀವ್ರ ಭೇದಿ, ಆಹಾರ ವಿಷಬಾಧೆ (Food Poisoning) ಹಾಗೂ ಇತರ ಗಂಭೀರ ಆರೋಗ್ಯ ಸಮಸ್ಯೆಗಳಿಗೆ ಕಾರಣವಾಗಬಹುದು ಎಂದು ವರದಿ ಎಚ್ಚರಿಸಿದೆ.

ಶೇ. 89ರಷ್ಟು ನಿಲ್ದಾಣಗಳಲ್ಲಿ ಕನಿಷ್ಠ ಸೌಲಭ್ಯಗಳ ಕೊರತೆ:

ಸಿಎಜಿ ವರದಿಯ ಮತ್ತೊಂದು ಪ್ರಮುಖ ಹಾಗೂ ಆತಂಕಕಾರಿ ಅಂಶವೆಂದರೆ, ಪರಿಶೀಲಿಸಲಾದ ಒಟ್ಟು 512 ನಿಲ್ದಾಣಗಳ ಪೈಕಿ 458 ನಿಲ್ದಾಣಗಳು ಅಂದರೆ ಶೇಕಡಾ 89ಕ್ಕೂ ಹೆಚ್ಚು ನಿಲ್ದಾಣಗಳು ಪ್ರಯಾಣಿಕರಿಗೆ ಒದಗಿಸಬೇಕಾದ ಕನಿಷ್ಠ ಅತ್ಯಗತ್ಯ ಸೌಲಭ್ಯಗಳನ್ನು ಕಲ್ಪಿಸುವಲ್ಲಿ ವಿಫಲವಾಗಿವೆ. ಈ ನಿಲ್ದಾಣಗಳಲ್ಲಿ ಕೆಲವು ಕಡೆ ಅಗತ್ಯ ಸೌಲಭ್ಯಗಳನ್ನು ಸಂಪೂರ್ಣವಾಗಿ ಒದಗಿಸದೇ ಇರುವುದು ಮತ್ತು ಇನ್ನು ಕೆಲವು ಕಡೆ ನಿಗದಿತ ಮಾನದಂಡಕ್ಕಿಂತ ಕಡಿಮೆ ಮಟ್ಟದಲ್ಲಿ ಸೌಲಭ್ಯಗಳನ್ನು ನೀಡಿರುವುದು ಬಹಿರಂಗವಾಗಿದೆ.

ಎನ್‌ಎಸ್‌ಜಿ-1ರಿಂದ ಎನ್‌ಎಸ್‌ಜಿ-6ರವರೆಗಿನ ವರ್ಗಗಳಿಗೆ ಸೇರಿದ ನಿಲ್ದಾಣಗಳಿಗೆ ಕನಿಷ್ಠ ಅತ್ಯಗತ್ಯ ಸೌಲಭ್ಯಗಳು ಹಾಗೂ ಶಿಫಾರಸು ಮಾಡಲಾದ ಸೌಲಭ್ಯಗಳನ್ನು ನಿಗದಿಪಡಿಸಿ ರೈಲ್ವೆ ಮಂಡಳಿ 2018ರ ಏಪ್ರಿಲ್‌ನಲ್ಲಿ ಸಮಗ್ರ ಸೂಚನೆ ನೀಡಿತ್ತು. ಅಲ್ಲದೆ, 2018ರ ಆಗಸ್ಟ್ 31ರೊಳಗೆ ಎಲ್ಲಾ ನಿಲ್ದಾಣಗಳಲ್ಲಿ ಕನಿಷ್ಠ ಸೌಲಭ್ಯಗಳನ್ನು ಕಡ್ಡಾಯವಾಗಿ ಒದಗಿಸಬೇಕು ಎಂದು ಸೂಚಿಸಲಾಗಿತ್ತು. ಆದರೆ, ಹಲವು ವರ್ಷಗಳ ಬಳಿಕವೂ ಹೆಚ್ಚಿನ ಸಂಖ್ಯೆಯ ನಿಲ್ದಾಣಗಳಲ್ಲಿ ಈ ಸೌಲಭ್ಯಗಳು ಪೂರ್ಣ ಪ್ರಮಾಣದಲ್ಲಿ ಲಭ್ಯವಾಗಿಲ್ಲದಿರುವುದು ವರದಿಯಿಂದ ತಿಳಿದುಬಂದಿದೆ.

ದೊಡ್ಡ ಪ್ರಮಾಣದ ಪ್ರಯಾಣಿಕರ ಮೇಲೆ ಪರಿಣಾಮ:

ಸಿಎಜಿ ಮಾಹಿತಿಯ ಪ್ರಕಾರ ಭಾರತೀಯ ರೈಲ್ವೆಯು ನಾನ್-ಸಬರ್ಬನ್ ಗ್ರೂಪ್ ಅಡಿಯಲ್ಲಿ ಒಟ್ಟು 5,908 ನಿಲ್ದಾಣಗಳನ್ನು ಹೊಂದಿದೆ. 2023-24ನೇ ಸಾಲಿನಲ್ಲಿ ಪ್ರತಿದಿನ 7,424ಕ್ಕೂ ಹೆಚ್ಚು ನಾನ್-ಸಬರ್ಬನ್ ಪ್ರಯಾಣಿಕರ ರೈಲುಗಳು ಸಂಚರಿಸಿದ್ದು, ಈ ರೈಲುಗಳಲ್ಲಿ ಒಟ್ಟು 292.4 ಕೋಟಿ ಪ್ರಯಾಣಿಕರು ಪ್ರಯಾಣಿಸಿದ್ದಾರೆ.

ಇಷ್ಟು ದೊಡ್ಡ ಪ್ರಮಾಣದಲ್ಲಿ ಪ್ರಯಾಣಿಕರು ರೈಲು ನಿಲ್ದಾಣಗಳ ಕುಡಿಯುವ ನೀರಿನ ಸೌಲಭ್ಯವನ್ನು ಅವಲಂಬಿಸಿರುವ ಹಿನ್ನೆಲೆಯಲ್ಲಿ, ವಾಟರ್ ಕೂಲರ್‌ಗಳ ನೀರಿನ ಗುಣಮಟ್ಟ ಮತ್ತು ನಿಲ್ದಾಣಗಳ ಸ್ವಚ್ಛತೆ ಕುರಿತು ಸಿಎಜಿ ವರದಿ ಗಂಭೀರ ಪ್ರಶ್ನೆಗಳನ್ನು ಎತ್ತಿದೆ.