ಸಿಂಗಾಪುರ, ಜುಲೈ 14:ಆಗ್ನೇಯ ಏಷ್ಯಾದಲ್ಲಿ ಸಂಭವಿಸುವ ಪ್ರಬಲ ಭೂಕಂಪಗಳಿಂದ ಅಲ್ಲಿನ ಕರಾವಳಿ ಪ್ರದೇಶಗಳನ್ಇನು ನಾಶಪಡಿಸಬಹುದೆಂದು ಸಿಂಗಾಪುರದ ನಾನ್ಯಾಂಗ್ ತಾಂತ್ರಿಕ ವಿಶ್ವವಿದ್ಯಾಲಯ (NTU) ನೇತೃತ್ವದಲ್ಲಿ ನಡೆದ ಅಧ್ಯಯನ ತಂಡ ಎಚ್ಚರಿಸಿದೆ.
ಪ್ರಸ್ತುತ ಇರುವ ಸಮುದ್ರ ಮಟ್ಟ ಏರಿಕೆಯ ಮುನ್ಸೂಚನೆಗಳು ತಗ್ಗು ಪ್ರದೇಶಗಳಲ್ಲಿ ಎದುರಾಗಬಹುದಾದ ಅಪಾಯಗಳನ್ನು ನಿಖರವಾಗಿ ಅಂದಾಜಿಸುತ್ತಿಲ್ಲ. ಏಕೆಂದರೆ, ಪ್ರಬಲ ಭೂಕಂಪಗಳ ನಂತರ ದೀರ್ಘಾವಧಿಯಲ್ಲಿ ಭೂಮಿಯ ಒಳಗಡೆ ನಡೆಯುವ ಚಲನೆಯನ್ನು ಅವುಗಳು ಪೂರ್ಣ ಪ್ರಮಾಣದಲ್ಲಿ ಗಣನೆಗೆ ತೆಗೆದುಕೊಳ್ಳುತ್ತಿಲ್ಲ ಎಂದು ಈ ಸಂಶೋಧಕರು ತಿಳಿಸಿದ್ದಾರೆ.
ಈ ಅಧ್ಯಯನಕ್ಕಾಗಿ ಸಂಶೋಧಕರು 2004ರ ಸುಮಾತ್ರಾ-ಅಂಡಮಾನ್ ಭೂಕಂಪ ಮತ್ತು 2012ರ ವಾರ್ಟನ್ ಬೇಸಿನ್ ಭೂಕಂಪಗಳ ನಂತರ ಸಿಂಗಾಪುರ, ಮಲೇಷ್ಯಾ ಮತ್ತು ಥೈಲ್ಯಾಂಡ್ನಲ್ಲಾದ ಸುಮಾರು ಎರಡು ದಶಕಗಳ ಭೂಚಲನೆಯ ದತ್ತಾಂಶಗಳನ್ನು (ಡೇಟಾ) ಪರಿಶೀಲಿಸಿದ್ದಾರೆ. ಭೂಕಂಪ ಸಂಭವಿಸಿದ ಕೇಂದ್ರದಿಂದ 600 ಕಿಲೋಮೀಟರ್ಗಿಂತಲೂ ದೂರದಲ್ಲಿರುವ ಪ್ರದೇಶಗಳಲ್ಲೂ ಭೂಮಿ ನಿರಂತರವಾಗಿ ಚಲಿಸುತ್ತಿರುವುದು ಈ ಸಂಶೋಧನೆಯಲ್ಲಿ ಪತ್ತೆಯಾಗಿದೆ.
ಸುಮಾತ್ರಾದ ಜ್ವಾಲಾಮುಖಿ ಸಾಲಿನ ಹಿಂಭಾಗದಲ್ಲಿರುವ ಪ್ರದೇಶವಾದ 'ಸುಮಾತ್ರನ್ ಬ್ಯಾಕ್-ಆರ್ಕ್'ನ ಮೇಲಿನ ಮ್ಯಾಂಟಲ್ (ಭೂಮಿಯ ಒಳಗಿನ ಪದರ) ಭಾಗದಲ್ಲಿರುವ ಬಿಸಿ ಬಂಡೆಗಳ ದುರ್ಬಲ ಪದರವೇ ಈ ಚಲನೆಗೆ ಕಾರಣ ಎಂದು ವಿಜ್ಞಾನಿಗಳು ಪತ್ತೆಹಚ್ಚಿದ್ದಾರೆ. ಈ ಪದರವು ಘನರೂಪದಲ್ಲಿದ್ದರೂ ಸಹ, ಕಾಲಕ್ರಮೇಣ ನಿಧಾನವಾಗಿ ತನ್ನ ರೂಪವನ್ನು ಬದಲಾಯಿಸಬಲ್ಲದು (ರೂಪಾಂತರಗೊಳ್ಳಬಲ್ಲದು). ಇದರಿಂದಾಗಿ ಪ್ರಬಲ ಭೂಕಂಪ ಸಂಭವಿಸಿದ ಹಲವು ವರ್ಷಗಳ ನಂತರವೂ ಅದರ ಮೇಲಿರುವ ಭೂಪ್ರದೇಶವು ನಿರಂತರವಾಗಿ ಚಲಿಸಲು ಮತ್ತು ಕುಸಿಯಲು ಕಾರಣವಾಗುತ್ತದೆ ಎಂದು ಅದ್ಯಾಯನ ಹೇಳಿದೆ.
"ಬೃಹತ್ ಭೂಕಂಪಗಳು ಸಂಭವಿಸಿದಾಗ, ಅವು ಕೇವಲ ಕೆಲವು ನಿಮಿಷಗಳ ಕಾಲ ಭೂಮಿಯನ್ನು ನಡುಗಿಸಿ ಸುಮ್ಮನಾಗುವುದಿಲ್ಲ. ಬದಲಿಗೆ ಭೂಮಿಯ ಆಳದಲ್ಲಿ ವರ್ಷಗಳ ಕಾಲ ಮುಂದುವರಿಯುವಂತಹ ನಿಧಾನಗತಿಯ ಭೌಗೋಳಿಕ ಹೊಂದಾಣಿಕೆಯನ್ನು ಅವು ಪ್ರೇರೇಪಿಸುತ್ತವೆ" ಎಂದು ಈ ಅಧ್ಯಯನದ ಪ್ರಮುಖ ಲೇಖಕಿ ಹಾಗೂ ಎನ್ಟಿಯುನ ಅರ್ಥ್ ಅಬ್ಸರ್ವೇಟರಿ ಆಫ್ ಸಿಂಗಾಪುರದ ರಿಸರ್ಚ್ ಫೆಲೋ ಆಗಿರುವ ಗ್ರೇಸ್ ನ್ಗ್ ಹೇಳಿದ್ದಾರೆ.
"ಭೂಕಂಪ ಸಂಭವಿಸಿದ ನೂರಾರು ಕಿಲೋಮೀಟರ್ ದೂರದ ಪ್ರದೇಶಗಳಲ್ಲೂ ಭೂಮಿ ನಿರಂತರವಾಗಿ ಚಲಿಸಲು ಮತ್ತು ಜಳುಗಲು ಸುಮಾತ್ರನ್ ಬ್ಯಾಕ್-ಆರ್ಕ್ ಅಡಿಯಲ್ಲಿರುವ ಬಿಸಿ ಬಂಡೆಗಳ ದುರ್ಬಲ ಪದರವೇ ಕಾರಣ ಎಂಬುದನ್ನು ನಮ್ಮ ಅಧ್ಯಯನವು ವಿವರಿಸುತ್ತದೆ" ಎಂದು ಅವರು ತಿಳಿಸಿದ್ದಾರೆ.
ಸಂಶೋಧಕರ ತಂಡವು ಭೂಮಿಯ ಪದರಗಳ ಕಂಪ್ಯೂಟರ್ ಮಾದರಿಗಳನ್ನು (ಕಂಪ್ಯೂಟರ್ ಮಾಡೆಲ್) ತಯಾರಿಸಿ, ಅವುಗಳನ್ನು ಈ ಪ್ರದೇಶದಲ್ಲಿ ಅಳವಡಿಸಲಾಗಿರುವ ಜಿಪಿಎಸ್ (GPS) ಕೇಂದ್ರಗಳು ದಾಖಲಿಸಿದ ಭೂಚಲನೆಯ ದತ್ತಾಂಶಗಳೊಂದಿಗೆ ಹೋಲಿಸಿ ನೋಡಿದ್ದಾರೆ. ಸುಮಾತ್ರನ್ ಬ್ಯಾಕ್-ಆರ್ಕ್ ಅಡಿಯಲ್ಲಿರುವ ಮೇಲಿನ ಮ್ಯಾಂಟಲ್ ಪದರವು ಕಾಲಕ್ರಮೇಣ ನಿಧಾನವಾಗಿ ಹರಿಯುವಷ್ಟು ದುರ್ಬಲವಾಗಿದ್ದರೆ ಮಾತ್ರ ಈ ರೀತಿಯ ಭೂಚಲನೆ ಸಾಧ್ಯ ಎಂಬುದನ್ನು ಸಂಶೋಧಕರು ಕಂಡುಕೊಂಡಿದ್ದಾರೆ.
ಈ ಸಂಶೋಧನೆಗೆ ದೀರ್ಘಾವಧಿಯ ನಿರಂತರ ನಿಗಾ ಅತ್ಯಂತ ಅಗತ್ಯವಾಗಿತ್ತು ಎಂದು ಅಧ್ಯಯನದ ಸಹ-ಲೇಖಕ ಹಾಗೂ ಎನ್ಟಿಯುನ ಸಹಾಯಕ ಪ್ರಾಧ್ಯಾಪಕ ಲುಜಿಯಾ ಫೆಂಗ್ ಹೇಳಿದ್ದಾರೆ.
"ಈ ಪ್ರದೇಶದಲ್ಲಿ ಅಳವಡಿಸಲಾಗಿರುವ ಭೂ-ಆಧಾರಿತ ಜಿಪಿಎಸ್ ನೆಟ್ವರ್ಕ್ಗಳಿಂದ ಒಂದು ದಶಕಕ್ಕೂ ಹೆಚ್ಚು ಕಾಲ ನಿರಂತರವಾಗಿ ಪಡೆದ ದತ್ತಾಂಶಗಳಿಲ್ಲದಿದ್ದರೆ ಈ ಅಧ್ಯಯನ ಸಾಧ್ಯವಾಗುತ್ತಿರಲಿಲ್ಲ. ಇಂತಹ ದೀರ್ಘಾವಧಿಯ ಭೌಗೋಳಿಕ ದಾಖಲೆಗಳು (Geodetic records), ಪ್ರಬಲ ಭೂಕಂಪಗಳಿಗೆ ಭೂಮಿಯು ಹೇಗೆ ಪ್ರತಿಕ್ರಿಯಿಸುತ್ತದೆ ಮತ್ತು ಈ ಪ್ರಕ್ರಿಯೆಗಳು ಕಾಲಾನಂತರದಲ್ಲಿ ಹೇಗೆ ಬದಲಾಗುತ್ತವೆ ಎಂಬುದನ್ನು ಅರ್ಥಮಾಡಿಕೊಳ್ಳಲು ಅತ್ಯಂತ ಪ್ರಮುಖವಾಗಿವೆ" ಎಂದು ಫೆಂಗ್ ತಿಳಿಸಿದ್ದಾರೆ.
ಒಂದು ಟೆಕ್ಟಾನಿಕ್ ಪ್ಲೇಟ್ (ಭೂಫಲಕ) ಮತ್ತೊಂದರ ಕೆಳಗೆ ನುಗ್ಗುವ 'ಸಬ್ಡಕ್ಷನ್ ವಲಯ'ಗಳು (Subduction zones) ಇರುವ ವಿಶ್ವದ ಇತರೆ ಭಾಗಗಳಲ್ಲೂ ಭೂಕಂಪದ ನಂತರ ಇಂತಹದೇ ಚಲನೆಗಳು ಸಂಭವಿಸಬಹುದು ಎಂದು ಈ ಅಧ್ಯಯನವು ತಿಳಿಸಿದೆ.