Pakistan ಕರಾಚಿ ಕರಾವಳಿ ತೀರದಲ್ಲಿ ಸರಕು ಸಾಗಣೆ ವಿಮಾನ ನಾಪತ್ತೆ,ತೀವ್ರ ಶೋಧ ಆರಂಭ

ಕರಾಚಿ , ಜುಲೈ 08 :  ಕರಾಚಿ ಕರಾವಳಿ ತೀರದಲ್ಲಿ ಬೋಯಿಂಗ್ ಸರಕು ಸಾಗಣೆ ವಿಮಾನ ನಾಪತ್ತೆಯಾಗಿದೆ. ಐದು ಮಂದಿ ಸಿಬ್ಬಂದಿಯೊಂದಿಗೆ ಕರಾಚಿಗೆ ಹೊರಟಿದ್ದ ಬೋಯಿಂಗ್ ಸರಕು ಸಾಗಣೆ (Cargo) ವಿಮಾನವು ಬುಧವಾರ ವಾಯು ಸಂಚಾರ ನಿಯಂತ್ರಣ ATC ಯೊಂದಿಗೆ ಸಂಪರ್ಕ ಕಳೆದುಕೊಂಡಿದೆ.  ಪಾಕಿಸ್ತಾನದ ರಕ್ಷಣಾ ಸಿಬ್ಬಂದಿ ವಿಮಾನ ಪತನಗೊಂಡಿರಬಹುದು ಎಂದು ಶಂಕಿಸಲಾದ ಸಮುದ್ರದ ವ್ಯಾಪ್ತಿಯಲ್ಲಿ ತೀವ್ರ ಶೋಧ ಆರಂಭಿಸಿದ್ದಾರೆ.

  ಪಾಕಿಸ್ತಾನದಲ್ಲಿ ನೋಂದಣಿಯಾಗಿದ್ದ ಬೋಯಿಂಗ್ 737 ಸರಕು ಸಾಗಣೆ ವಿಮಾನವು ಮಂಗಳವಾರ ರಾತ್ರಿ ಕರಾಚಿಗೆ ಬರುತ್ತಿದ್ದಾಗ, ತನ್ನ ಪಥದರ್ಶಕ ವ್ಯವಸ್ಥೆಯಲ್ಲಿ (ನ್ಯಾವಿಗೇಷನ್ ಸಿಸ್ಟಮ್) ತಾಂತ್ರಿಕ ದೋಷವಿರುವುದಾಗಿ ವರದಿ ಮಾಡಿದ ಬೆನ್ನಲ್ಲೇ ವಾಯು ಸಂಚಾರ ನಿಯಂತ್ರಣದೊಂದಿಗೆ ಸಂಪರ್ಕ ಕಳೆದುಕೊಂಡಿದೆ ಎಂದು ಪಾಕಿಸ್ತಾನದ ವಿಮಾನಯಾನ ಅಧಿಕಾರಿಗಳು ಹೇಳಿದ್ದಾರೆ.  ಅರಬ್ಬಿ ಸಮುದ್ರದಲ್ಲಿ ನಾಪತ್ತೆಯಾಗಿರುವ ಈ 27 ವರ್ಷ ಹಳೆಯ ಪರಿವರ್ತಿತ ಸರಕು ಸಾಗಣೆ ವಿಮಾನದ ಪತ್ತೆಗಾಗಿ ರಕ್ಷಣಾ ಕಾರ್ಯಾಚರಣೆಯನ್ನು ತೀವ್ರಗೊಳಿಸುವಂತೆ ಪ್ರಧಾನಿ ಶೆಹಬಾಜ್ ಷರೀಫ್ ಅಧಿಕಾರಿಗಳಿಗೆ ಸೂಚಿಸಿದ್ದಾರೆ. 

ವಿಮಾನವನ್ನು ನಿರ್ವಹಿಸುತ್ತಿದ್ದ 'ಕೆ2 ಏರ್‌ವೇಸ್' (K2 Airways) ಸಂಸ್ಥೆಯು, ವಿಮಾನದಲ್ಲಿದ್ದ ಐದು ಜನರಲ್ಲಿ ಇಬ್ಬರು ಪೈಲಟ್‌ಗಳು, ಇಬ್ಬರು ಎಂಜಿನಿಯರ್‌ಗಳು ಮತ್ತು ಒಬ್ಬ ಪೂರಕ ಸಿಬ್ಬಂದಿ ಸೇರಿದ್ದಾರೆ ಎಂದು ತಿಳಿಸಿದೆ.

ಪಾಕಿಸ್ತಾನದ ಪ್ರಮಾಣಿತ ಕಾಲಮಾನದ ಪ್ರಕಾರ ಮಂಗಳವಾರ ರಾತ್ರಿ 9:18 ಕ್ಕೆ ವಿಮಾನವು ಕರಾಚಿಯತ್ತ ಹಾರುತ್ತಿದ್ದಾಗ ನ್ಯಾವಿಗೇಷನ್ ವ್ಯವಸ್ಥೆಯ ಸಮಸ್ಯೆಯನ್ನು ವರದಿ ಮಾಡಿತ್ತು ಎಂದು ಏರ್‌ಪೋರ್ಟ್ಸ್ ಅಥಾರಿಟಿ ತಿಳಿಸಿದೆ. 

ಸ್ಥಳೀಯ ವಾಯು ಸಂಚಾರ ನಿಯಂತ್ರಕರು ಅದಕ್ಕೆ ಮಾರ್ಗದರ್ಶನ ನೀಡಲು ಪ್ರಯತ್ನಿಸಿದರಾದರೂ, ಕೇವಲ ಮೂರು ನಿಮಿಷಗಳ ನಂತರ ರಾಡಾರ್ ವ್ಯವಸ್ಥೆಯಲ್ಲಿ ವಿಮಾನವು ಅತ್ಯಂತ ವೇಗವಾಗಿ ಕೆಳಕ್ಕೆ ಇಳಿಯುತ್ತಿರುವುದು ಕಂಡುಬಂದಿತು ಮತ್ತು ಸಂಪರ್ಕ ಕಡಿತಗೊಂಡಿತು. ಆ ಸಮಯದಲ್ಲಿ ವಿಮಾನವು ಕರಾಚಿಯಿಂದ ಪಶ್ಚಿಮಕ್ಕೆ ಸುಮಾರು 155 ನಾಟಿಕಲ್ ಮೈಲಿ (287 ಕಿ.ಮೀ) ದೂರದಲ್ಲಿತ್ತು ಎಂದು ಪ್ರಕಟಣೆಯಲ್ಲಿ ತಿಳಿಸಲಾಗಿದೆ.  ಫ್ಲೈಟ್‌ರಾಡಾರ್24 ಸಂಗ್ರಹಿಸಿದ ಅಂತಿಮ ನಿಮಿಷಗಳ ಡೇಟಾ ಅತ್ಯಂತ ಗೊಂದಲಮಯವಾಗಿತ್ತು. ವಿಮಾನವು ಕೇವಲ ಒಂದು ನಿಮಿಷಕ್ಕಿಂತ ಕಡಿಮೆ ಅವಧಿಯಲ್ಲಿ ಸುಮಾರು 5,000 ಅಡಿ ಕೆಳಕ್ಕೆ ಧುಮುಕಿದೆ, ನಂತರ ಮುಂದಿನ 30 ಸೆಕೆಂಡುಗಳಲ್ಲಿ ಸುಮಾರು 6,000 ಅಡಿ ಮೇಲಕ್ಕೆ ಏರಿದೆ ಮತ್ತು ಕೊನೆಗೆ 36,550 ಅಡಿ ಎತ್ತರದಿಂದ ಭೀಕರವಾಗಿ ಕೆಳಕ್ಕೆ ಕುಸಿದಿದೆ. 

ವಿಮಾನದಿಂದ ರವಾನೆಯಾದ ಕೊನೆಯ ಸಂಕೇತದ ಪ್ರಕಾರ, ಅದು ಸಮುದ್ರ ಮಟ್ಟದಿಂದ ಕೇವಲ 1,100 ಅಡಿ ಎತ್ತರದಲ್ಲಿದ್ದಾಗ ಪ್ರತಿ ನಿಮಿಷಕ್ಕೆ ಮೈನಸ್ 22,400 ಅಡಿ (ಗಂಟೆಗೆ ಸುಮಾರು 400 ಕಿಲೋಮೀಟರ್) ವೇಗದಲ್ಲಿ ಕೆಳಕ್ಕೆ ಧಾವಿಸುತ್ತಿತ್ತು. ಇದು ಅತ್ಯಂತ ಕಡಿದಾದ ಮತ್ತು ಅಸಹಜವಾದ ಪತನದ ದರವಾಗಿದೆ ಎಂದು ತಜ್ಞರು  ಅಭಿಪ್ರಾಯಪಟ್ಟಿದ್ದಾರೆ.

 ಸಿಬ್ಬಂದಿಯ ಸ್ಥಿತಿಯ ಬಗ್ಗೆ ಅಧಿಕಾರಿಗಳು ಇನ್ನೂ ಯಾವುದೇ ಅಧಿಕೃತ ಘೋಷಣೆ ಮಾಡಿಲ್ಲವಾದರೂ, ಪ್ರಧಾನಿ ಷರೀಫ್ ಅವರು ಅವರ ಕುಟುಂಬಗಳಿಗೆ ತಮ್ಮ "ಹೃದಯಾಳದ ಸಂತಾಪ" ಸೂಚಿಸಿದ್ದಾರೆ.

  ವಿಮಾನಗಳ ಚಲನವಲನವನ್ನು ಪತ್ತೆಹಚ್ಚುವ 'ಫ್ಲೈಟ್‌ರಾಡಾರ್24' (Flightradar24) ಸಂಸ್ಥೆಯ ಪ್ರಕಾರ, ವಿಮಾನವು ಕರಾಚಿಯ ನೈಋತ್ಯ ಭಾಗದ ಸಮುದ್ರದಲ್ಲಿ ಪತನಗೊಂಡಿರಬಹುದು ಎಂದು ಶಂಕಿಸಲಾಗಿದೆ.