ನ್ಯೂಯಾರ್ಕ್, ಜುಲೈ20 : ನ್ಯೂಯಾರ್ಕ್-ನ್ಯೂಜರ್ಸಿ ಕ್ರೀಡಾಂಗಣದಲ್ಲಿ ನಡೆದ ಫೀಫಾ (FIFA) ವಿಶ್ವಕಪ್ 2026ರ ಫೈನಲ್ ಪಂದ್ಯದಲ್ಲಿ ಸ್ಪೇನ್ ತಂಡದ ಫೆರಾನ್ ಟೊರೆಸ್ ತಮ್ಮ ತಂಡದ ಮೊದಲ ಗೋಲು ಬಾರಿಸಿ ಸಂಭ್ರಮಿಸಿದರು. ಈ ಬಾರಿಯ ವಿಶ್ವಕಪ್ನಲ್ಲಿ ಫೆರಾನ್ ಟೊರೆಸ್ ಬಾರಿಸಿದ ಮೊದಲ ಗೋಲು ಅವರ ಜೀವನದ ಅತ್ಯಂತ ಶ್ರೇಷ್ಠ ಗೋಲಾಗಿ ಮಾರ್ಪಟ್ಟಿತು, ಮತ್ತು ಇದು ಸ್ಪೇನ್ ದೇಶವನ್ನು ಮತ್ತೆ ಫುಟ್ಬಾಲ್ ಜಗತ್ತಿನ ಉನ್ನತ ಸಿಂಹಾಸನದಲ್ಲಿ ತಂದುಕೂರಿಸಿತು. ತಮ್ಮ ಕೊನೆಯ ವಿಶ್ವಕಪ್ ಪಂದ್ಯವೆಂದು ಸೂಚಿಸಿದ್ದ ಲಿಯೋನೆಲ್ ಮೆಸ್ಸಿ ಅವರ ಎರಡನೇ ಸತತ ವಿಶ್ವಕಪ್ ಚಾಂಪಿಯನ್ ಆಗುವ ಕನಸನ್ನು ನುಚ್ಚುನೂರು ಮಾಡಿದ ಟೊರೆಸ್, ಪರ್ಯಾಯ (ಬೆಂಚ್) ಆಟಗಾರನಾಗಿ ಮೈದಾನಕ್ಕಿಳಿದು 106ನೇ ನಿಮಿಷದಲ್ಲಿ ಗೋಲು ಬಾರಿಸಿದರು. ಭಾನುವಾರ ನಡೆದ ಈ ಪಂದ್ಯವನ್ನು ಪೂರ್ಣವಾಗಿ ತನ್ನ ನಿಯಂತ್ರಣದಲ್ಲಿಟ್ಟುಕೊಂಡಿದ್ದ ಸ್ಪೇನ್, 1-0 ಅಂತರದ ಗೆಲುವಿನೊಂದಿಗೆ ಅರ್ಜೆಂಟೀನಾದ ಸಾಮ್ರಾಜ್ಯವನ್ನು ಅಂತ್ಯಗೊಳಿಸಿತು.ಪೆನಾಲ್ಟಿ ಬಾಕ್ಸ್ನಲ್ಲಿ ಬೌನ್ಸ್ ಆಗುತ್ತಿದ್ದ ಚೆಂಡನ್ನು ವಶಕ್ಕೆ ಪಡೆದ ಟೊರೆಸ್, ತಮ್ಮ ಎಡಗಾಲಿನಿಂದ ಕ್ರಾಸ್ಬಾರ್ನ ಕೆಳಗಿನಿಂದ ನೆಟ್ಗೆ ತಳ್ಳಿದರು."ಇದು 4.7 ಕೋಟಿ (47 ಮಿಲಿಯನ್) ಜನರು ಬಾರಿಸಿದ ಗೋಲು" ಎಂದು ಸ್ಪೇನ್ನ ಜನಸಂಖ್ಯೆಯನ್ನು ಉಲ್ಲೇಖಿಸಿ ಟೊರೆಸ್ ಹೇಳಿದರು.
ಇದು 2010 ರಲ್ಲಿ ಗೆದ್ದ ನಂತರ ಸ್ಪೇನ್ ಪಡೆದ ಎರಡನೇ ವಿಶ್ವಕಪ್ ಶೀರ್ಷಿಕೆಯಾಗಿದೆ. ಮತ್ತು ಈ ಪ್ರದರ್ಶನದ ನಂತರ, ಫುಟ್ಬಾಲ್ ಜಗತ್ತಿನ ಕೇಂದ್ರ ಬಿಂದು ಯಾವುದು ಎಂಬುದರಲ್ಲಿ ಯಾವುದೇ ಅನುಮಾನವಿಲ್ಲ.ಸ್ಪೇನ್ ಈ ಪಂದ್ಯಾವಳಿಯ ಎಂಟು ಪಂದ್ಯಗಳಲ್ಲಿ ಕೇವಲ ಒಂದು ಗೋಲನ್ನು ಮಾತ್ರ ಬಿಟ್ಟುಕೊಟ್ಟಿತು, ಇದು ವಿಶ್ವಕಪ್ ಇತಿಹಾಸದಲ್ಲೇ ಚಾಂಪಿಯನ್ ತಂಡವೊಂದು ಬಿಟ್ಟುಕೊಟ್ಟ ಅತ್ಯಂತ ಕನಿಷ್ಠ ಗೋಲುಗಳ ದಾಖಲೆಯಾಗಿದೆ. ಜೊತೆಗೆ, 2023 ರಲ್ಲಿ ಸ್ಪೇನ್ ಮಹಿಳಾ ತಂಡ ಗೆದ್ದ ವಿಶ್ವಕಪ್ನೊಂದಿಗೆ, ಪುರುಷರ ಮತ್ತು ಮಹಿಳೆಯರ ವಿಶ್ವಕಪ್ ಚಾಂಪಿಯನ್ ಪಟ್ಟವನ್ನು ಒಂದೇ ಸಮಯದಲ್ಲಿ ಹೊಂದಿರುವ ಮೊದಲ ಯುರೋಪಿಯನ್ ರಾಷ್ಟ್ರ ಎಂಬ ಹೆಗ್ಗಳಿಕೆಗೆ ಸ್ಪೇನ್ ಪಾತ್ರವಾಗಿದೆ.
ಈ ಅದ್ಭುತ ಕೇವಲ ಫುಟ್ಬಾಲ್ಗೆ ಮಾತ್ರ ಸೀಮಿತವಾಗಿರಲಿಲ್ಲ. ಫೀಫಾ ಇತಿಹಾಸದಲ್ಲೇ ಮೊದಲ ಬಾರಿಗೆ ಪಂದ್ಯದ ಮಧ್ಯಂತರದಲ್ಲಿ (Halftime Show) ಮನರಂಜನಾ ಕಾರ್ಯಕ್ರಮ ಆಯೋಜಿಸಲಾಗಿತ್ತು. ಚಲನಚಿತ್ರ, ಕ್ರೀಡೆ ಮತ್ತು ಸಂಗೀತ ಕ್ಷೇತ್ರದ ಪ್ರಖ್ಯಾತ ಗಣ್ಯರಾದ ಬ್ರಾಡ್ ಪಿಟ್, ಟಾಮ್ ಕ್ರೂಸ್, ಮ್ಯಾಟ್ ಡ್ಯಾಮನ್, ಸಿಲಿಯನ್ ಮರ್ಫಿ, ಡೇನಿಯಲ್ ಕ್ರೇಗ್, ಸ್ಟೀಫನ್ ಕರ್ರಿ, ವಿಕ್ಟರ್ ವೆಂಬನ್ಯಾಮಾ, ಶೈ ಗಿಲ್ಜಿಯಸ್-ಅಲೆಕ್ಸಾಂಡರ್, ಜೇಲನ್ ಬ್ರನ್ಸನ್, ಕೆವಿನ್ ಡ್ಯುರಾಂಟ್, ಸೆರೆನಾ ವಿಲಿಯಮ್ಸ್, ಕಾರ್ಲೋಸ್ ಅಲ್ಕಾರಾಜ್, ಡೇವಿಡ್ ಬೆಕ್ಹ್ಯಾಮ್, ಜಿನೆಡಿನ್ ಜಿಡಾನೆ ಸೇರಿದಂತೆ ಹತ್ತಾರು ಪ್ರಸಿದ್ಧ ವ್ಯಕ್ತಿಗಳು ಉಪಸ್ಥಿತರಿದ್ದರು.
https://x.com/WhiteHouse/status/2078976201188606160?s=20
80,000 ಜನರು ಮೈದಾನದಲ್ಲಿ ಹಾಗೂ ಜಗತ್ತಿನಾದ್ಯಂತ ಸುಮಾರು 200 ಕೋಟಿ (2 ಬಿಲಿಯನ್) ಜನರು ವೀಕ್ಷಿಸಿದರು.
https://x.com/NachoConO/status/2078974505242824875/video/1