ಮಂಗಳೂರು,ನ.18: ಮುಂಬರುವ ಪ್ರತಿಷ್ಠಿತ ಕರಾವಳಿ ಉತ್ಸವ, ಬೀಚ್ ಉತ್ಸವ ಸೇರಿದಂತೆ ಜಿಲ್ಲಾಡಳಿತ ಆಯೋಜಿಸುವ ವಿವಿಧ ಸರ್ಕಾರಿ ಕಾರ್ಯಕ್ರಮಗಳ ಅಧಿಕೃತ ಛಾಯಾಗ್ರಹಣ (Photography), ವೀಡಿಯೋಗ್ರಹಣ (Videography) ಹಾಗೂ ಫೋಟೋ/ರೀಲ್ಸ್ ಸ್ಪರ್ಧೆಗಳ ಆಯೋಜನೆಯ ಜವಾಬ್ದಾರಿಯನ್ನು ಸ್ಥಳೀಯ ಛಾಯಾಗ್ರಾಹಕರಿಗೆ ನೀಡುವಂತೆ ಸೌತ್ ಕೆನರಾ ಫೋಟೋಗ್ರಾಫರ್ಸ್ ಅಸೋಸಿಯೇಷನ್ (SKPA) ಮಂಗಳೂರು ವಲಯ ಮನವಿ ಮಾಡಿದೆ.
ಜಿಲ್ಲಾ ಉಸ್ತುವಾರಿ ಸಚಿವ ಯು ಟಿ ಖಾದರ್ ಹಾಗೂ ದಕ್ಷಿಣ ಕನ್ನಡ ಜಿಲ್ಲಾಧಿಕಾರಿ ದರ್ಶನ್ ಎಚ್.ವಿ. (IAS) ಅವರಿಗೆ ಅಸೋಸಿಯೇಷನ್ನ ಅಧ್ಯಕ್ಷರು ಮತ್ತು ಕಾರ್ಯದರ್ಶಿಗಳ ನೇತೃತ್ವದ ನಿಯೋಗ ಭೇಟಿ ಮಾಡಿ ಬುಧವಾರ ಮನವಿ ಪತ್ರ ಸಲ್ಲಿಸಿತು.
ಮನವಿಯಲ್ಲಿರುವ ಪ್ರಮುಖ ಬೇಡಿಕೆಗಳೇನು?
ಅಧಿಕೃತ ಛಾಯಾಗ್ರಹಣ ಮತ್ತು ವೀಡಿಯೋಗ್ರಹಣ:
ಒಂದು ತಿಂಗಳ ಕಾಲ ವಿಜೃಂಭಣೆಯಿಂದ ನಡೆಯುವ ಕರಾವಳಿ ಉತ್ಸವ, ಬೀಚ್ ಉತ್ಸವ, ಕ್ರೀಡೋತ್ಸವ, ಸಾಂಸ್ಕೃತಿಕ ಕಾರ್ಯಕ್ರಮಗಳು ಹಾಗೂ ಪ್ರವಾಸೋದ್ಯಮ ಇಲಾಖೆಯ ಕಾರ್ಯಕ್ರಮಗಳ ಛಾಯಾಗ್ರಹಣದ ಕಾರ್ಯಾದೇಶವನ್ನು (Orders) ಆದ್ಯತೆಯ ಮೇರೆಗೆ SKPA ಮಂಗಳೂರು ವಲಯದ ಸದಸ್ಯರಿಗೆ ನೀಡಬೇಕು.
ಫೋಟೋ ಮತ್ತು ರೀಲ್ಸ್ ಸ್ಪರ್ಧೆಗಳ ಆಯೋಜನೆ:
ಉತ್ಸವದ ಅಂಗವಾಗಿ ಸಾರ್ವಜನಿಕರು ಮತ್ತು ಯುವಜನತೆಯನ್ನು ಆಕರ್ಷಿಸಲು ಆಯೋಜಿಸಲಾಗುವ ಫೋಟೋಗ್ರಫಿ ಮತ್ತು ರೀಲ್ಸ್ ಸ್ಪರ್ಧೆಗಳನ್ನು ಸಂಸ್ಥೆಯ ವತಿಯಿಂದಲೇ ಅಚ್ಚುಕಟ್ಟಾಗಿ ಆಯೋಜಿಸಿ, ನಿರ್ವಹಿಸಲು ಅವಕಾಶ ಕಲ್ಪಿಸಬೇಕು.
ತಾಂತ್ರಿಕ ಸಹಕಾರ ಮತ್ತು ದಾಖಲೀಕರಣ:
ಉತ್ಸವದ ಸಂಪೂರ್ಣ ದಾಖಲೀಕರಣ (Documentation) ಹಾಗೂ ತಾಂತ್ರಿಕ ನಿರ್ವಹಣೆಗೆ ಸ್ಥಳೀಯ ವೃತ್ತಿಪರರ ಸೇವೆಯನ್ನು ಜಿಲ್ಲಾಡಳಿತವು ಬಳಸಿಕೊಳ್ಳಬೇಕು.
ಸ್ಥಳೀಯ ಪ್ರತಿಭೆಗಳಿಗೆ ಪ್ರೋತ್ಸಾಹ ನೀಡಲು ಒತ್ತಾಯ:
"ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ಅತ್ಯುನ್ನತ ತಂತ್ರಜ್ಞಾನ, ಆಧುನಿಕ ಸಲಕರಣೆಗಳು ಹಾಗೂ ಅಂತಾರಾಷ್ಟ್ರೀಯ ಮಟ್ಟದ ಕೌಶಲ್ಯ ಹೊಂದಿರುವ ನೂರಾರು ವೃತ್ತಿಪರ ಛಾಯಾಗ್ರಾಹಕರಿದ್ದಾರೆ. ಸ್ಥಳೀಯ ಕಲೆ, ಸಂಸ್ಕೃತಿ ಮತ್ತು ಭೌಗೋಳಿಕ ಹಿನ್ನೆಲೆಯ ಸ್ಪಷ್ಟ ಅರಿವು ನಮ್ಮ ಸದಸ್ಯರಿಗಿದೆ. ಸ್ಥಳೀಯರಿಗೆ ಅವಕಾಶ ನೀಡುವುದರಿಂದ ಇದೇ ವೃತ್ತಿಯನ್ನು ನಂಬಿಕೊಂಡಿರುವ ನೂರಾರು ಕುಟುಂಬಗಳ ಆರ್ಥಿಕತೆಗೆ ಬೆಂಬಲ ನೀಡಿದಂತಾಗುತ್ತದೆ" ಎಂದು SKPA ಪದಾಧಿಕಾರಿಗಳು ಮನವಿಯಲ್ಲಿ ತಿಳಿಸಿದ್ದಾರೆ.
ಜಿಲ್ಲಾಡಳಿತವು ಈ ಮನವಿಯನ್ನು ಸಹಾನುಭೂತಿಯಿಂದ ಪರಿಶೀಲಿಸಿ, ಸೂಕ್ತ ಅವಕಾಶ ಕಲ್ಪಿಸಿಕೊಡಬೇಕೆಂದು ಸಂಘಟನೆಯು ವಿನಂತಿಸಿದೆ.

.jpeg)